Dünya Bankının Cənubi Qafqaz üzrə regional direktoru Mersi Tembon Gəncədə Azərbaycan Xalq Cumhuriyyətinin muzeyini ziyarət edib. Dünya Bankı rəsmisinə hazırda Azərbaycan Dövlət Aqrar Universitetinin yerləşdiyi bu binanın müstəqil Azərbaycan dövlətinin ilk hökumət binası olduğu bildirilib. Xanım Mersi Tembonun Gəncəyə səfəri Azərbaycan Dövlət Aqrar Universitetində keçirilən Azərbaycanın Dünya Bankında üzvlüyünün 25 illiyi və ölkənin kənd təsərrüfatının inkişafı sahəsində fəaliyyətinin 20 illiyinə həsr olunmuş tədbir çərçivəsində baş tutub. Azərbaycanın qürurverici tarixə malik olduğunu bildirən xanım Tembon qeyd edib ki, ölkəmizin müstəqilliyinin bərpasından sonra Dünya Bankı daim öz dəstəyi ilə Azərbaycanın yanında olub və hal-hazırda iqtisadiyyatın bütün sahələrində inkişafa dəstəklə bu yaxınlığı nümayiş etdirir.

“Bu gün Azərbaycanın qərb bölgəsinin mərkəzi, qədim Gəncə şəhərində olmaqdan məmnunluq duyuram. Şadam ki, 25 illik etimada əsaslanan əməkdaşlığımız müddətində Dünya Bankı Azərbaycanın inkişafına töhfə verib. Mən kənd təsərrüfatının  və kənd yerlərinin inkişafı sahəsində əməkdaşlığımızı xüsusilə qeyd etmək istərdim. Əminəm ki, birgə işimiz Azərbaycanın bütün bölgələrinin dayanıqlı və tarazlı tərəqqisinə gələcəkdə də kömək edəcək” – xanım Tembon deyib.

Kənd Təsərrüfatı nazirinin müavini Seyfəddin Talıbov qonaqları Azərbaycan tarixində belə dəyərli iz qoymuş məkanda salamlamaqdan qürur duyduğunu bildirib. Nazir müavini qeyd edib ki, Dünya Bankı Azərbaycan Hökumətinin ən etibarlı və mühüm tərəfdaşlarından biridir. Dünya Bankının dəstəyi ilə Kənd Təsərrüfatı Nazirliyi tərəfindən bir neçə layihənin həyata keçirildiyini diqqətə çatdıran Seyfəddin Talıbov hazırda davam edən Kənd Təsərrüfatının Rəqabət Qabiliyyətinin Gücləndirilməsi Layihəsi və  İkinci Kənd İnvestisiya Layihəsini xüsusilə vurğulayıb. Tədbirin ADAU-da keçirilməsinə diqqəti çəkən nazir müavini gələcəyin aqrar mütəxəssislərinin Azərbaycan hökumətinin və Dünya Bankının ölkədə həyata keçirdikləri layihələrdən xəbərdar olmalarının vacibliyini bildirib. Nazir müavini Dünya Bankının layihələrdə kadr hazırlığına xüsusi diqqət verdiyini əlavə edib. Xüsusilə, Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində keçirilən tədbirlərdə Azərbaycan Dövlət Aqrar Universitetinin tələbələrinin iştirakının, heyvan sağlamlığı və baytarlıq təbabəti ixtisası üzrə təcrübi fəaliyyətlərə cəlb edilmələrinin, bitki mühafizəsi ixtisası üzrə kurrikulum hazırlanmasının, elmi-tədqiqat işləri ilə məşğul olan gənc kadrların xaricdə və ölkəmizdə müxtəlif proqramlarda iştirakının gələcəyin aqrar mütəxəssis potensialının gücləndirilməsinə töhfə olduğunu vurğulayıb.

Tədbirdə Dünya Bankı ilə birgə həyata keçirilən Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində yerli şitil, yerli tərəvəz toxumu və yerli kişmiş istehsalı dəyər zənciri sub-layihələri qrantı almış Samux və Şəmkir fermer-sahibkarları ilk dəfə olaraq, öz layihələrini ictimaiyyətə təqdim ediblər.  

Tədbirdən sonra Dünya Bankı nümayəndələri ADAU yataqxanasındakı şəraitlə və universitetdə yeni tikilmiş müasir tipli tədris-təcrübə ferma kompleksi ilə tanış olublar.

Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətində 20 Yanvar faciəsinin iyirmi səkkizinci ildönümü ilə əlaqədar anım tədbiri keçirilib.

Dövlət Xidmətinin və idarəçiliyində olan beynəlxalq layihələrin əməkdaşlarının iştirak etdiyi tədbirdə şəhidlərin xatirəsi 1 dəqiqəlik sükutla anılıb. Tədbirdə 1990-cı il yanvar ayının 19-dan 20-sinə keçən gecə və sonrakı günlərdə baş vermiş faciəvi hadisələri yaxşı xatırladığını bildirən Dövlət Xidmətinin rəis müavini Abbas Qaracayev həmin hadisələrin xalqımızın tarixində xüsusi yer aldığını bildirib.

Rəis müavini gənclərə 20 Yanvar faciəsinin tarixini öyrənməyi, yadda saxlamağı və övladlarına da öyrətməyi tövsiyə edərək, “20 Yanvar tarixini milli qürur günümüz kimi yaşatmaq bizim, sizin, övladlarınızın borcudur” - deyə, bildirib.

Tədbirdə çıxış edənlərdən “Kənd Yerlərinin Kompleks İnkişafı Layihəsi”nin baş mühəndisi Mehman Rzayev 20 Yanvar hadisələrinə siyasi qiymət verilməsinin ümummilli liderimiz Heydər Əliyevin prezidentliyi dövrünə təsadüf etdiyini vurğulayaraq, “Şəhidlər verdiyimizə, günahsız insanların qətlə yetirilməsinə illər sonra da yansaq da, Azərbaycanın müstəqillik qazanmasında 1990-cı il 20 yanvar tarixinin xüsusi yeri olduğunu dana bilmərik” – deyə, əlavə edib.

Tədbir iştirakçıları şəhidlərimizin ruhuna rəhmət diləyib, yalnız Azərbaycan dövlətçiliyini qorumaqla, xalqa xidmət etməklə onların xatirəsini uca tuta biləcəklərini vurğulayıblar.

Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti elektron satınalma (e-procurement) sistemini tətbiq etmək məqsədilə dünyada mövcud sistemləri araşdırır.

Dövlət Xidməti bu sahədə ən qabaqcıl təcrübəyə malik Cənubi Koreya təcrübəsini öyrənəcək. Bu məqsədlə Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti Koreya Beynəlxalq Əməkdaşlıq Agentliyi (KOİCA) ilə əməkdaşlıq edəcək.

E-satınalmanın tətbiqi nəticəsində satınalmaların mərkəzləşdirilmiş şəkildə həyata keçirilməsinə nail olunacaq. Bu, müvafiq xərcləri azaltmağa, satınalma prosesini sürətləndirməyə imkan verməklə yanaşı, bir pəncərə prinsipinin tətbiqi sayəsində şəffaflığın artırılmasına şərait yaradacaq.

Elektron satınalmaların pilot olaraq, Dövlət Xidmətinin idarə etdiyi beynəlxalq layihələrdə həyata keçiriləcəyi gözlənilir.

Qeyd edək ki, Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti hazırda Dünya Bankı, İslam İnkişaf Bankı və Kənd Təsərrüfatının İnkişafı üzrə Beynəlxalq Fond (İFAD) ilə birgə 3 iri layihə həyata keçirir. Bu layihələrdən başqa, aqrar sahədə BMT-nin Ərzaq və Kənd Təsərrüfatı Təşkilatı (FAO), Avropa İttifaqı, Türkiyə, Yaponiya hökumətləri ilə texniki yardım və qrant layihələri icra edir. Dövlət Xidməti, həmçinin fermerlərə dövlət tərəfindən verilən kənd təsərrüfatı kreditlərini idarə edir.

Dekabrın 27-də nazir Heydər Əsədov Dünya Bankının Azərbaycan üzrə Nümayəndəliyinin rəhbəri Navid Həsən Naqvi və Əməliyyatlar üzrə baş mütəxəssis Səidə Bağırlı ilə görüşüb.

 

Görüşdə əsas məqsəd Dünya Bankı ilə kənd təsərrüfatı sahəsində mövcud əməkdaşlıq haqqında müzakirələrin aparılması olub.

 

Qonaqları səmimi salamlayan nazir Heydər Əsədov Dünya Bankı ilə uzun müddətdir ki, əməkdaşlıq edildiyini, bir çox layihələrin artıq yekunlaşaraq yüksək nəticələr verdiyini,Quba rayonunda Fermer Evinin özünü doğrultduğunu, ictimaiyyətin rəğbətini qazandığını, hal-hazırda 2 layihənin də uğurla həyata keçirildiyini diqqətə çatdırıb. Bildirib ki, Azərbaycan Kənd İnvestisiya Layihəsi çərçivəsində 2000 kiçik layihə icra olunub. Layihənin uğurları bu ilin oktyabrında Dünya Bankının Vaşinqtonda keçirilən 17-ci İllik İclasında müzakirə olunub və yüksək dəyərləndirilib. Digər bir layihə - Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində bruselyoza qarşı aparılmış tədbirlər planı da Çikaqoda "Bruselyoza qarşı mübarizə” üzrə Beynəlxalq Cəmiyyət tərəfindən yüksək dəyərləndirilib və bu təhlükəli xəstəliyin mövcud olduğu digər ölkələrdə də analoji üsulun seçilməsi tövsiyə olunub.

 

Dünya Bankının Azərbaycan üzrə Nümayəndəliyinin rəhbəri Navid Həsən Naqvi səmimi qəbula görə təşəkkür edib və sentyabr ayında keçirilmiş Dünya Bankı ilə tərəfdaşlığın 25-ci ilıdönümünə həsr olunmuş tədbiri xatırladaraq, 2 tədbirin keçirilməsinin planlaşdırıldığını diqqətə çatdırıb. Həmin tədbirlərin biri 2018-ci ilin əvvəlində Azərbaycan Dövlət Aqrar Universitetində keçiriləcək. Digər tədbir isə Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində aralıq missiya ilə qarşıda duran vəzifələrin müzakirələrinin başlaması olacaq.

Kənd Təsərrüfatı Nazirliyi Dünya Bankı ilə yeni başlayacaq layihəyə hazırlıq məqsədilə icmaları təşkilatın ekoloji və sosial idarəetmə prinsipləri ilə tanış edir.

 

Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti Dünya Bankı ilə birgə həyata keçirdiyi Azərbaycan Kənd İnvestisiya Layihəsinin (AzKİL) növbəti – 3-cü mərhələsinə hazırlıq məqsədilə regional təlimlərə başlayıb.

 

Təlimlər  dekabrın 25-dən başlayaraq yanvarın 6-dək İsmayıllı, Göygöl, Sabirabad, Bərdə, Masallı rayonlarında və Naxçıvanı əhatə edəcək.

 

Məqsəd AzKİL çərçivəsində sublayihələr seçərkən və təsdiqləyərkən Dünya Bankının sadiq qaldığı prinsiplərlə kənd icmalarını tanış etməkdir.

 

Azərbaycan Kənd İnvestisiya Layihəsində birbaşa ekoloji problemlərin həllinə yönəlmiş sublayihələr həyata keçirilməsi gözlənilməsə də, yolların, su xətlərinin çəkilməsi, icmalara məxsus müxtəlif obyektlərin təmiri və tikintisi, təsərrüfatların yaradılması və inkişafının dəstəklənməsi kimi layihələr reallaşdırılır və bu layihələrin ətraf mühitə təsiri mütləq nəzərə alınır. Layihənin “Ekoloji və Sosial İdarəetmə üzrə çərçivə sənədi” təklif edələn kiçik icma layihələrinin ekoloji qiymətləndirilməsinin aparılmasını, Azərbaycanda mövcud ekoloji-normativ aktlara uyğun olmasını, sosial və sosial-iqtisadi qiymətləndirmə, gəlir gətirən sahələrə diqqətin artırılmasını, ictimai iştirak, informasiya şəffaflığı kimi tələblərə malikdir. Uşaq əməyinin qadağan olunması, mədəni irsin, təbii mənzərələrin qorunması, tullantıların düzgün zərərsizləşdirilməsi, insan sağlamlığının, şəxsi mülkiyyətin qorunması  və bir çox başqa tələblər sənəddə yer alıb, qarşıya çıxacaq problemlərin həlli yolları göstərilib.

 

Azərbaycan Kənd İnvestisiya Layihəsi Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin icra etdiyi 3 iri beynəlxalq  layihədən biridir. İndiyədək layihə çərçivəsində 3,5 milyon kəndlinin faydalandığı 2000 sublayihə icra olunub.  Dövlət Xitmətinin icra etdiyi digər layihələr Dünya Bankı ilə icra olunan “Kənd Təsərrüfatının Rəqabət Qabiliyyətinin Gücləndirilməsi” Layihəsi və İslam İnkişaf Bankı və Kənd Təsərrüfatının İnkişafı üzrə Beynəlxalq Fondla (İFAD) icra olunan “Kənd Yerlərinin Kompleks İnkişafı” Layihəsidir.

Dekabrın 26-da Kənd Təsərrüfatı Nazirliyində FAO-Azərbaycan Tərəfdaşlıq Proqramı (FATP) Rəhbər Komitəsinin ikinci görüşü keçirilib.

Görüşün məqsədi FAO-Azərbaycan Tərəfdaşlıq Proqramı (FATP) çərçivəsində layihə təkliflərinin qiymətləndirilməsi olub.

Nazirliyin müvafiq şöbələri və qurumlarının rəhbərlərinin, həmçinin Xarici İşlər, Ekologiya və Təbii Sərvətlər və Maliyyə Nazirliklərinin nümayəndələrinin iştirak etdiyi görüşdə “FAO-Azərbaycan tərəfdaşlıq proqramı” çərçivəsində təqdim olunan layihələr müzakirə olunub.

Nazir müavini İlham Quliyev qonaqları səmimi salamlayaraq FAO ilə Azərbaycan arasında həyata keçirilən layihələri yüksək qiymətləndirib, gələcəkdə də yeni layihələrin həyata keçirilməsi üçün əməkdaşlığa önəm verdiyini bildirib. Nazir müavini FAO tərəfindən təklif olunan layihələrin Nazirlik tərəfindən birgə müzakirə edilməklə həyata keçirildiyini diqqətə çatdırıb.

Kənd Təsərrüfatı Nazirliyinin Heyvandalığın inkişafı şöbəsinin müdiri Qalib Əbdüləliyev “Azərbaycanda iribuynuzlu damazlıq heyvanların effektiv yetişdirilməsi və yemlənməsi sistemlərinin yaradılması yolu ilə iribuynuzlu heyvandarlığın inkişaf etdirilməsi”, həmçinin “Azərbaycanın yüksək və alçaq dağlıq əraziləri üçün dayanıqlı qoyunçuluq istehsalı strategiyalarının hazırlanması” layihələri barədə geniş məlumat verib və bu layihələrin heyvandarlığın inkişafına öz töhvəsini verəcəyini diqqətə çatdırıb.

Tərəvəzçilik Elmi-Tədqiqat İnstitutunun direktor müavini Elmar Allahverdiyev “Azərbaycanda xəstəliklərdən azad milli kartof toxumçuluğu sisteminin yaradılması” layihəsi barədə ətraflı məlumat verərək ölkəmizdə bu sahənin inkişafı üçün potensial imkanların olduğunu nəzərə çatdırıb.

Görüşdə hər bir layihə ətrafında geniş fikir mübadiləsi aparılıb.

BMT-nin Ərzaq və Kənd Təsərrüfatı Təşkilatının (FAO) Azərbaycan üzrə Tərəfdaşlıq və Əlaqələndirmə Ofisinin rəhbəri Melek Çakmak FAO ilə Azərbaycan arasında olan əməkdaşlığı yüksək qiymətləndirərək nəzərdə tutulan yeni layihələrin həyata keçirilməsi üçün öz səylərini əsirgəməyəcəyini bildirib.  

Bu gün Azərbaycan Respublikasının kənd təsərrüfatı nazirinin müavini Seyfəddin Talıbov Dünya Bankının kənd təsərrüfatı üzrə tapşırıq qrupunun rəhbəri  Bekzod Şamsiyev ilə görüşüb.

Görüşün məqsədi Cənubi Qafqaz ölkələrində Rəqəmsal və Mexanikləşdirilmiş Kənd Təsərrüfatı üzrə Regional Tədqiqatın başlanması ilə bağlı müzakirələrin aparılması olub.

Nazir müavini qonaqları səmimi salamlayaraq 2014-cü ildən aqrar sahədə həyata keçirilən köklü dəyişikliklər barədə geniş məlumat verib və Dünya Bankı tərəfindən ölkəmizdə həyata keçirilən layihələri yüksək qiymətləndirmiş, bu əlaqələrin davamlı olaraq inkişaf edəcəyinə əminliyini bildirib.

Nazir müavini Azərbaycanda kənd təsərrüfatının mexanikləşməsi və elektronlaşması istiqamətində əhəmiyyətli işlər görüldüyünü, artıq Elektron Kənd Təsərrüfatı İnformasiya Sisteminin formalaşdığını, sistemin digər dövlət qurumlarının analoji sistemlərinə  inteqrasiya edildiyini vurğulayıb. 

Seyfəddin Talıbov 2014-2017-ci illərdə kənd təsərrüfatı texnika parkının yenilənməsi, dünyanın ən inkişaf etmiş ölkələrindən ən müasir texnikaların alınaraq ölkəmizə gətirilməsi, bu sahədə elktron sistemin qurulmasını, bu dövrdə kənd təsərrüfatı üçün alınmış innovativ texnikanın əvvəlki 9 ildə alınan texnikanın 60%-ni təşkil etdiyni bildirib. Həmçinin ixracyönümlü sahələrin inkişafı ilə bağlı yeni texnikaların alınması işlərinin həyata keçirildiyini, taxılçılıq və pambıqçılıq üzrə texnika parkının yeniləndiyini diqqətə çatdırıb.

Seyfəddin Talıbov əlavə edib ki, 2014-cü ildən kənd təsərrüfatı texnikalarının elektron qeydiyyat sisteminin qurulmasına başlanıb. Aqrolizinq ASC-nin lizinq əməliyyatları elektron sistemə keçirilib. Həmçinin, Nazirliyin daha bir tabeli qurumu olan Dövlət Texniki Nəzarət Müfəttişliyi də fəaliyyətini elektronlaşdırıb. Gələcəkdə texnikaların peyk sistemi vasitəsilə izlənməsini tətbiq etmək bu qurumların atacaqları addımlar sırasındadır.

Sonra Dünya Bankının nümayəndəsi, kənd təsərrüfatı iqtisadı üzrə mütəxəssis Bekzod Şamsiyev Cənubi Qafqazda kənd təsərrüfatında innovativ texnologiyaların tətbiqi  ilə bağlı tədqiqata başlamaq istədiklərini bildirib. Qonaq qeyd edib ki, 6 ay müddətində araşdırılan regionda mövzu ilə bağlı hazırkı vəziyyət, dünyada mövcud innovativ texnologiyalar və bu texnologiyaların araşdırılan ölkələrdə tətbiqi imkanları öyrəniləcək və tövsiyələr hazırlanacaq. Araşdırılacaq innovativ texnologiyalar xəstəliklərin monitorinqi, investisiya ehtiyaclarının öyrənilməsi, bazar imkanlarının asanlaşdırılması, təchizat zəncirinin təşkili, ekoloji qiymətləndirmə kimi bir neçə qrupu əhatə edəcək.  “Bu texnologiyalar dünyada yeni deyil.  Sadəcə olaraq, getdikcə ucuzlaşır və daha əlçatan olur. Biz bu texnologiyalardan kənd təsərrüfatı məhsulları istehsalçılarının və onlara xidmət göstərənlərin faydalanmasına çalışacağıq” -Dünya Bankı nümayəndəsi belə deyib.

Ətraflı təqdimatına görə qonağa təşəkkür edən nazir müavini Seyfəddin Talıbov Dünya Bankı nümayəndəsinin təklifinin “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”ndə qarşıya qoyulmuş bir sıra hədəflərə uyğun olduğunu bildirib və nazirliyin araşdırmaya istənilən dəstəyi verməyə hazır olduğunu əlavə edib.

Görüşdə Kənd Təsərrüfatı Nazirliyi Aparatının rəhbəri İlham Bayramov Elektron Kənd Təsərrüfatı İnformasiya Sistemi üzrə görülmüş işlər barədə təqdimat edib.

 

20-dək beynəlxalq təşkilat və inkişaf agentliklərinin nümayəndələrinin iştirak etdiyi görüşdə “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”ndə Kənd Təsərrüfatı Nazirliyinin qarşısına qoyulmuş hədəflər üzrə görülmüş işlər barədə məlumat verilib. Qeyd edilib ki, Azərbaycan Respublikası Prezidentinin xüsusi diqqətində olan kənd təsərrüfatının müxtəlif sahələri üzrə qəbul edilmiş yeni proqramlar, təkmilləşdirilmiş qanunvericilik bazası strateji hədəflərə daha tez nail olmağa imkan yaradır.

 

Görüşdə kənd təsərrüfatı məhsullarının ixrac tempinin 40-60%-ə çatması, ərzaqlıq buğda idxalının azalması vurğulanıb.

 

Tədbirdə qeyd edilib ki, hazırda Kənd Təsərrüfatı Nazirliyinin beynəlxalq donorlarla icra etdiyi elə bir layihə yoxdur ki, orada “Strateji yol xəritəsi”ndə qarşıya qoyulmuş hədəflər nəzərə alınmasın.

 

Kənd Təsərrüfatı Nazirliyi Yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin müxtəlif donorlarla birgə icra etdiyi layihələr çərçivəsində fermerlərin maliyyə çıxışının asanlaşdırılması ilə bağlı araşdırmalar aparılmış və geniş tədbirlər planı hazırlanmış, aqrar sığorta sisteminin qurulması ilə bağlı layihəyə start verilmiş, toxum sektorunun inkişafı üçün addımlar atılmış, bitki sağlamlığı, kadr hazırlığı, kənd yerlərinin inkişafı istiqamətində əhəmiyyətli işlər görülmüşdür. 

 

Görüşdə donorlarla strateji hədəflər üzrə növbəti əməkdaşlıq imkanları müzakirə edilib. 5-ci Donor Əlaqələndirmə Görüşündə Kənd Təsərrüfatı Nazirliyinin aqrar sahəyə investisiya qoyuluşlarının təşviqi barədə təqdimatı nümayiş etdirilib.

Dekabrın 7-də Kredit zəmanət fondunun yaradılması imkanlarına baxılması ilə bağlı  tədbirlər üzrə İşçi Qrupunun iclası keçirilib.

İclasda kənd təsərrüfatı üzrə kredit zəmanət fondunun yaradılması imkanları nəzərdən keçirilib, mövcud vəziyyət və beynəlxalq təcrübə təhlil edilib və növbəti tədbirlər müzakirə olunub.

Bildirilib ki, kənd təsərrüfatı üzrə kredit zəmanət fondunun yaradılması imkanlarına baxılması “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”nin 3-cü strateji hədəfinin bəndlərindən biridir.

İclasa cəlb edilmiş mütəxəssislər qeyd ediblər ki, beynəlxalq təcrübə ümumi və kənd təsərrüfatı üzrə sektoral kredit zəmanət fondunun yaradılması mümkünlüyünü ortaya qoyur. Xüsusilə, inkişaf edən ölkələrin təcrübələrində kredit zəmanət fondları, kənd təsərrüfatı və kənd yerləri üzrə kiçik və orta fermer təsərrüfatlarının və sahibkarlığın inkişafına töhfə verir və “Azərbaycan Respublikasının Kredit Zəmanət Fondu” ASC-nin yaradılması bu istiqamətdə atılan ən mühüm addımlardan biridir.

Kənd təsərrüfatı üçün kredit zəmanət fondunun yaradılması sahənin xüsusiyyətlərini nəzərə almaqla ilk növbədə girovları olmayan, lakin ödəniş qabiliyyəti və sağlam iqtisadi fəaliyyəti olan kənd təsərrüfatı sahibkarlarının kreditlərə çıxışının asanlaşdırılması, kreditlər üzrə girov bazasının genişləndirilməsi, kredit təşkilatlarının vəsaitlərinin aqrar sektorun kreditləşməsinə yönəldilməsinin stimullaşdırılması mümkün ola bilər.

Fond aqrar sahədə kiçik və orta sahibkarlığın yaradılması və onların sonradan iri fermer təsərrüfatlarına çevrilməsi üçün xüsusi əhəmiyyət kəsb edən, beynəlxalq təcrübəyə uyğun maliyyə dəstəyidir.

Müzakirələrin nəticəsində kənd təsərrüfatı üzrə kredit zəmanət fondunun yaradılması imkanları ilə bağlı hazırlanan təkliflərin aidiyyəti qurumlar tərəfindən rəy verilməsi üçün Hökumətə təqdim edilməsi məqsədəuyğun hesab edildi.

 

Dekabrın 5-də “Kənd təsərrüfatının maliyyə resurslarına tələbatı üzrə hədəflərin müəyyənləşdirilməsi” ilə bağlı tədbirlər üzrə Azərbaycan Respublikası kənd təsərrüfatı nazirinin müvafiq Əmrinə əsasən yaradılmış İşçi qrupunun iclası keçirilib.

İclasa işçi qrupunun üzvləri ilə yanaşı,  cəlb edilmiş mütəxəssislər də iştirak edib. İşçi qrupunun iclası çərçivəsində kənd təsərrüfatının maliyyə resurslarına tələbatı üzrə hədəflərin müəyyənləşdirilməsi məqsədilə kənd təsərrüfatının maliyyələşdirilməsində mövcud vəziyyətin təhlilinə imkan verən  məlumatların aidiyyəti dövlət qurumlardan əldə edildiyi bildirilmiş, sözügedən hədəflərin müəyyənləşdirilməsi istiqamətdə tətbiqi mümkün olan metodologiya və yanaşmalar müzakirə edilmiş, eyni zamanda, bu sahədə beynəlxalq təşkilatların təcrübəsinin öyrənilməsinə ehtiyac olduğu vurğulanmışdır. Yanaşmadan asılı olaraq, torpaqların mövcud vəziyyəti, su ilə təminat səviyyəsi, fermerlərin texnika və gübrəyə olan tələbatı və s. öyrənilərək, daha  təfsilatlı təhlillərin və yerlərdə sorğuların aparılmasına ehtiyac ola biləcəyi qeyd edilmişdir. Həmçinin,  işçi qrupunun fəaliyyətinə cəlb edilmiş  mütəxəssislər kreditləşmə ilə bağlı aparılan təhlillərin nəticələrini təqdim ediblər.

İclasda işçi qrup çərçivəsində müvafiq iş bölgüsünün aparılması,  dövlət qurumlarından əldə edilən məlumatların təhlil edilməsi, əlavə məlumatlara ehtiyac olduğu halda sorğular göndərilməsi, maliyyə resurslarına olan tələbat ilə bağlı ilkin hədəflərin müəyyənləşdirilməsi üzrə tədbirlər görülməsi qərara alınmışdır.