Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti kəndlərdə əhalinin məşğulluq səviyyəsini artırmaq və aqrar bizneslərin sayını artırmaq üçün innovativ layihəyə başlayıb. Dövlət Xidmətinin Dünya Bankı ilə birgə həyata keçirdiyi Kənd İnvestisiya Layihəsi çərçivəsində qadınların aqrar bizneslərinin formalaşdırılmasına dəstək veriləcək.

“Kəndlərdə yaşayan əhalinin yarıdan çoxunu qadınlar təşkil edir. Bu həssas qrupun məşğulluğu ailələrin rifahı üçün böyük əhəmiyyət daşıyır. Buna görə də bizim əsas hədəflərimizdən biri qadınların kənd iqtisadiyyatında fəallığını təmin etməkdir” - Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin rəisi Mirzə Əliyev yeni layihəni şərh edərkən belə deyib.

Layihə çərçivəsində yaradılmış yeni model kənd qadınlarının iqtisadi imkanlara çıxışını məhdudlaşdıran sosial-iqtisadi maneələri aradan qaldırmaqla onların təşkilatlanmasına kömək edir. Modelə əsasən, eyni məhəllədə yaşayan və qarşılıqlı olaraq bir-birinə dəstək olan 15-20 qadın bir araya gəlib qrup yaradır və öz biznes təşkilatlarını formalaşdırır. Qrupun fəaliyyəti bacarıqların artırılması, maliyyə savadlılığı, həyat bacarıqları, biznesin inkişafı və idarə edilməsi, sağlamlıq və qidalanma kimi mövzuları əhatə edir. Modelə yeni əlavə olunmuş elementlər ağıllı kənd bizneslərinin yaradılmasında texnologiyalardan istifadə, dəyər zəncirlərinə qoşulmaq, dövlət və özəl mənbələrdən olan qarışıq maliyyə vəsaitlərinə çıxış əldə etməkdən ibarətdir.

Kənd İnvestisiya Layihəsi çərçivəsində, pilot olaraq, 5 rayonda - Masallı, Ağdam, Lənkəran, İsmayıllı və Balakən rayonlarında 100-ə yaxın qadından ibarət 6 Qadın İnkişaf Qrupu təsis edilib.

Qadın bizneslərinə dəstək vermək üçün qadın qrupları yaradılan rayonlarda gənclərdən ibarət İcma Biznes Təbliğatçıları qrupları da yaradılıb. “Layihəyə qatılan gənclər ilkin biznesin inkişafı və idarə edilməsi proqramı üzrə təlim alıblar. Onlar Azərbaycan Kənd İnvestisiya Layihəsinin əməkdaşları ilə birgə öz rayonlarında biznes inkubatorları yaradacaqlar. Bu inkubatorlar Qadın İnkişaf Qruplarına kəndlərdə biznesin qurulması, inkişafı, idarə edilməsi və genişləndirilməsi xidmətləri göstərəcək. Onlar qadın qruplarına gəlir gətirə bilən təkliflər hazırlamaqda kömək edəcək və onları maliyyə mənbələri və bazarlarla əlaqələndirəcəklər” – Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin rəisi Mirzə Əliyev deyib. 

Qeyd edək ki, yeni yaradılan model beynəlxalq təcrübəyə əsaslanır və ilk növbədə, biznes fəaliyyətinə başlayan kəndli qadınların maliyyəyə çıxışını asanlaşdırmaq məqsədi daşıyır.

 

Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin Dünya Bankı ilə birgə icra etdiyi Kənd Təsərrüfatının Rəqabət Qabiliyyətinin Gücləndirilməsi Layihəsi fermer assosiasiyaları üçün təqdimat keçirib. Təqdimatda  özəl biznes nümayəndələrinə Layihə çərçivəsində həyata keçirilən Dəyər Zəncirlərinin Yaradılması sub-komponenti barədə məlumat verilib. Komponent rəhbəri Rəşad Kərimov, aqrobiznes üzrə mütəxəssis Nəzakət Əsədova fermerlərə layihədən necə faydalana biləcəklərini ətraflı izah ediblər. Bildirilib ki, Dəyər Zəncirlərinin Yaradılması sub-komponenti idxalı əvəzləmək və ixracı artırmaq məqsədilə ölkədə yüksək rəqabət qabiliyyətinə malik kənd təsərrüfatı məhsullarının istehsalı məqsədi daşıyır. Sub-komponent çərçivəsində verilən qrantlardan faydalanmaq üçün fermer və sahibkarlar innovative layihə təklif etməlidirlər. Təklif olunan layihələrdə innovativ yanaşmadan başqa, tərəfdaşlıq da əsas tələbdir. Belə ki, qrant bir nəfərin deyil, bütöv dəyər zənciri iştirakçılarının – tarladan süfrəyədək istehsal zəncirinin bütün üzvlərinin mövcud problemlərinin həllinə yönəlməlidir.

Təqdimatda fermer assosiasiyalarını maraqlandıran suallara cavab verilib. 

Görüşdə Azərbaycan Giləmeyvə İstehsalçıları və İxracatçıları Assosiasiyası, Azərbaycan Meyvə-Tərəvəz İstehsalçıları və İxracatçıları Assosiasiyası, Azərbaycan Arıçılar Assosiasiyası, Azərbaycan Toxumçular Assosiyası, Azərbaycan Südçülər Assosiasiyası, Azərbaycan Xurma İstehsalçıları və İxracatçıları Assosiasiyası, Azərbaycan Çəltikçilik Assosiasiyasının rəhbər və nümayəndələri iştirak ediblər.

 

Aqrar fəaliyyətlə məşğul olanların güzəştli kredit üçün banka getməsinə ehtiyac qalmayacaq. Fermer və sahibkarlar müraciətlərini elektron platforma üzərindən online ünvanlaya biləcəklər.

Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin saytında yaradılmış platforma (http://agrocredit.agro.gov.az/login ) fermer, Dövlət Xidməti və kredit təşkilatlarını bir ünvana yığır.  

Xidmətin rəisi Mirzə Əliyev bildirib ki, öz ASAN imzası vasitəsilə platformaya daxil olan fermer kredit üçün müraciət formasını doldurur: “Fermer özü və təsərrüfatı haqqında məlumatları, istədiyi kredit məbləğini, təklif etdiyi girovu qeyd edib, müvəkkil kredit təşkilatını seçir və doldurulmuş müraciət formasını platform vasitəsilə göndərir. Fermerin göndərdiyi müraciət həm bankda, həm də Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin Kredit Şöbəsində izlənilir və araşdırılır. Yeni platforma fermer və sahibkarların işini yüngülləşdirərək, evdən çıxmadan kredit üçün müraciət etmək imkanı yaradacaq, eləcə də kredit müraciətlərinin qəbulunda şəffaflığı təmin edəcək”.  

Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin rəisi Mirzə Əliyev bildirib ki, yaxın vaxtlarda platformada fermer və sahibkarların öz məsrəf və mənfəətlərini hesablamaq imkanı da olacaq. Elektron platforma vasitəsilə kredit götürənlər aqrar kreditlərini də ödəyə biləcəklər.

Azərbaycanda xırdabuynuzlu heyvanların bruselyoz xəstəliyinə qarşı İordaniya istehsalı olan “REV-1” vaksini ilə peyvəndləmə aparılır. 2018-ci ilin aprel ayından növbəti peyvəndləmə kampaniyasına başlanılıb. Bu kampaniya çərçivəsində avqustun 1-nə kimi ölkə üzrə 3-8 aylıq dişi xırdabuynuzlu heyvanların peyvəndlənməsi aparılıb.

Hazırda 3 aylıqdan yuxarı yaş qrupuna daxil olan və müxtəlif səbəblərdən peyvənd edilməmiş dişi, lakin boğaz olmayan xırdabuynuzlu heyvanların peyvəndlənməsi davam etdirilir.

Dövlət Baytarlıq Xidməti və Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti ilə Dünya Bankının birgə həyata keçirdiyi “Kənd Təsərrüfatının Rəqabət Qabiliyyətinin Gücləndirilməsi Layihəsi”nin mütəxəssisləri xırdabuynuzlu heyvanlarda bruselyoz xəstəliyinə qarşı peyvəndləmənin gedişatını və keyfiyyətini qiymətləndirmək məqsədi ilə birgə Masallı, Neftçala, Siyəzən, Qusar, Oğuz, Zaqatala, Şamaxı, Yevlax, Şəmkir, Beyləqan, Ağcabədi və Sabirabad rayonlarına səfər ediblər.

Səfər çərçivəsində peyvəndləmənin həyata keçirilməsində “soyuq zəncir” prinsipinə və təhlükəsizlik qaydalarına əməl olunmasına, xüsusi geyim formalarından və qoruyucu vasitələrdən istifadə edilməsinə, eləcə də ətraf mühitin çirklənməsinin qarşısını almaq üçün biotəhlükəsizlik torbalarından istifadə olunmasına və peyvəndləmə aparılan ərazilərin dezinfeksiya edilməsinə xüsusi diqqət yetirilib.

Qeyd edək ki, rayon baytarlıq idarələri və sahə baytarlıq məntəqələri bruselyoz xəstəliyinə qarşı aparılan tədbirlər zamanı lazım olan avadanlıq, ləvazimat, vaksin, dezinfeksiya maddələri və xüsusi geyim vasitələri ilə təmin ediliblər.

2018-ci ilin yanvar–iyul ayları ərzində Azərbaycan ərazisində Kənd Təsərrüfatı Nazirliyi tərəfindən təsdiq olunmuş epizootik tədbirlər planına uyğun olaraq ölkə ərazisində iri və xırdabuynuzlu heyvanların bruselyoz xəstəliyinə qarşı peyvəndləmə və qanalma tədbirləri aparılıb. 2018-ci ilin ilk 8 ayı ərzində bruselyoz xəstəliyinə qarşı 1471330 baş xırdabuynuzlu heyvanda “Rev-1” vaksini ilə, 366947 baş iribuynuzlu heyvanda “S-19”  vaksini ilə peyvəndləmə işləri aparılıb.

Həmçinin həssas heyvanlar arasında bruselyoz xəstəliyini aşkar etmək, xəstəliyin yayılmasının qarşısını almaq məqsədi ilə 2018-ci ilin ilk 8 ayı ərzində 518760 baş iribuynuzlu, 150764 baş xırdabuynuzlu heyvanlardan qan nümunəsi alınaraq seroloji müayinə edilib.

Hazırda ölkə ərazisində bruselyoz xəstəliyinə qarşı peyvəndləmə və qanalma tədbirləri davam etdirilir.

 

Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti üzümçülüklə məşğul olan fermerlər üçün Samux rayonunda təlim keçirib.

Təlim Dövlət Xidmətinin Dünya Bankı ilə birgə həyata keçirdiyi “Kənd Təsərrüfatının Rəqabət Qabiliyyətinin Gücləndirilməsi” Layihəsi çərçivəsində baş tutub.

Təlim Layihənin aqrobiznes dəyər zəncirlərinin yaradılması üzrə seçib qrant müqaviləsi imzaladığı “Samux rayonunda quru meyvə istehsalı” sub-layihəsinin tərəfdaş fermerləri üçün təşkil olunub. Layihədə 9 fermer birləşsə də, təlim açıq olduğundan 80 nəfərədək üzümçünün, eləcə də mütəxəssisin bu təlimdə iştirak etmək şansı olub. Beynəlxalq ekspert Əliəşrəf Xəlilli üzümün becərilməsi qaydaları barədə, yerli mütəxəssis Nəzakət İsmayılzadə üzüm bitkisində rast gəlinən zərərvericilər və onlara qarşı mübarizə üsulları haqda fermer və mütəxəssisləri məlumatlandırıb.

Ekspertlərin nəzəri təqdimatlarından sonra təlim iştirakçıları layihə iştirakçısı olan fermerlərin sahələrinə səfər edib, biliklərini praktiki nümayişlə möhkəmlədiblər.

Qeyd edək ki, Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində 20-dək aqrobiznes dəyər zənciri layihələrinə qrant verilməsi nəzərdə tutulub. Artıq 5 layihəyə görə Dövlət Xidməti ilə sahibkarlar arasında müqavilə imzalanıb. Bir neçə layihə də təsdiqlənmə ərəfəsindədir. Biz bu layihəni həyata keçirməklə, kənd təsərrüfatı məhsulları istehsalında möhkəm, qırılmaz dəyər zəncirlərinin iqtisadiyyatda nümunə ola biləcək pilot modelləri hazırlamaq nəzərdə tutulub. Qrant layihələri tərəfdaşlıq üzərində qurulmalı, səmərəlilik vəd etməli, rəqabətqabiliyyətli ixrac potensiallı məhsul istehsalına və idxalın  əvəzləməsinə yönəlməlidir.

Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti fermer və sahibkarlar arasında məlumatlandırma kampaniyasına başlayıb. Kampaniyanın məqsədi kənd təsərrüfatı sahəsində dəyər zəncirlərinin yaradılması üzrə qrant layihələrinin hazırlanması üçün fermer və sahibkarları məlumatlandırmaqdır. Aqrobiznes dəyər zənciri layihələrinə qrantlar Dövlət Xidmətinin Dünya Bankı ilə birgə həyata keçirdiyi Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində maliyyələşdirilir.

Bütün ölkəni əhatə edəcək kampaniya çərçivəsində Layihənin əməkdaşları artıq Qəbələ, İsmayıllı, Qax, Şamaxı, Goranboy, Göygöldə fermer və sahibkarlarla görüşüb, onlara qrantlar ayrılması üçün layihələrinin seçim meyarları barədə ətraflı məlumat veriblər.

“Biz bu layihə çərçivəsində 20-dək aqrobiznes dəyər zənciri layihəsinə qrant ayırmağı nəzərdə tutmuşuq. Məlumatlandırmanın birinci mərhələsindən keçən dövrdə təqdim edilmiş layihələri dəyərləndirdik və meyarlara cavab verənləri seçdik. Artıq 5 layihəyə görə müqavilə imzalamışıq. Bir neçə layihə də təsdiqlənmə ərəfəsindədir. Biz bu layihəni həyata keçirməklə, kənd təsərrüfatı məhsulları istehsalında möhkəm, qırılmaz dəyər zəncirlərinin iqtisadiyyatda nümunə ola biləcək pilot modellərini hazırlamaq istəyirik. Sayın məhdud olması da məhz bununla bağlıdır” – bunu Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin rəisi Mirzə Əliyev bildirib. Dəyər zəncirləri üzrə layihələrin seçimi zamanı üstünlük verilən meyarlara aydınlıq gətirən Mirzə Əliyev əsas cəhət kimi istehsalda innovativlik tələbinin qoyulduğunu bildirib. “Bundan başqa, qrantdan bir adamın deyil, dəyər zəncirinin bütün üzvlərinin faydalanması nəzərdə tutulduğundan, layihənin tərəfdaşlıq üzərində qurulması, səmərəlilik vəd etməsi, rəqabətqabiliyyətli ixrac potensiallı məhsul istehsal etməsi və idxalı  əvəzləməsi dəyər zənciri layihəsini qiymətləndirmə zamanı vacib məqamlardır”, – deyə, Xidmət rəisi əlavə edib.

Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin həyata keçirdiyi Kənd Təsərrüfatının Rəqabət Qabiliyyətinin Gücləndirilməsi Layihəsinin dəstəyi ilə ölkədə özəl toxumçuların ilk ümumrespublika müşavirəsi keçirilib. Tədbirin məqsədi toxum və ting istehsalçılarının qarşısında duran problemləri müzakirə etmək, həlli yollarını axtarmaq və onları ümumi məqsədlərinə çatmaq üçün təşkilatlandırmaqdır. Müşavirədə özəl toxumçularla yanaşı, Azərbaycan Respublikasının Kənd Təsərrüfatı Nazirliyinin, Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin, Bitki Sortlarının Qeydiyyatı və Toxum Nəzarəti üzrə Dövlət Xidmətinin, Dünya Bankı/Beynəlxalq Maliyyə Korporasiyasının, BMT-nin Ərzaq və Kənd Təsərrüfatı Təşkilatının (FAO), Beynəlxalq Əmək Təşkilatının nümayəndələri də iştirak ediblər.

 

Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin rəisi Mirzə Əliyev tədbiri açaraq, toxumçuluğun və tingçiliyin ölkə daxilində inkişafının, fermerlərin yerli istehsal məhsulu olan toxum və tinglərlə təmin edilməsinin ölkənin ərzaq təhlükəsizliyi istiqamətində mühüm addımlardan olduğunu bildirib. Bu gün ölkədə toxuma olan tələbatın böyük hissəsinin idxal hesabına ödənildiyini təəssüflə qeyd edən xidmət rəisi Azərbaycan Respublikası Prezidentinin 6 dekabr 2016-cı il tarixli Fərmanı ilə təsdiq edilmiş “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”-ndə toxum sektorunun inkişafının Strateji Hədəf kimi qarşıya qoyulduğunu vurğulayıb.

 

“Görüləcək tədbirlər sırasında toxum və ting istehsalının təşviq edilməsi, toxum və ting istehsalçılarının fəaliyyətlərinin gücləndirilməsinə dəstək verilməsi, istehsalda keyfiyyətə nəzarət sisteminin yaradılması və sertifikatlaşdırma mexanizminin təkmilləşdirilməsi, toxumçuluq laboratoriyalarının fəaliyyətinin təkmilləşdirilməsi və başqa bu kimi addımların atılması gözlənilir” – Mirzə Əliyev deyib.

 

Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin həyata keçirdiyi layihələr çərçivəsində toxumçuluq sektorunun inkişafı istiqamətində bir sıra işlər görüldüyünü tədbir iştirakçılarının diqqətinə çatdırıb. Əlavə edib ki, istər Dünya Bankı ilə birgə icra olunan Kənd Təsərrüfatının Rəqabət Qabiliyyətinin Gücləndirilməsi Layihəsi, istərsə də Kənd Təsərrüfatının İnkişafı üzrə Beynəlxalq Fondla icra olunan Kənd Yerlərinin Kompleks İnkişafı və BMT İnkişaf Proqramı ilə yeni icraya başlanan “Qlobal əhəmiyyətli aqro-bioloji müxtəlifliyin mühafizəsi və davamlı istifadəsi” layihələri üzrə bir sıra işlər görülüb.

 

Kənd Təsərrüfatının Rəqabət Qabiliyyətinin Gücləndirilməsi Layihəsinin direktoru Anar Əzimov layihə çərçivəsində Bitki Sortlarının Qeydiyyatı və Toxum Nəzarəti üzrə Dövlət Xidmətinin 9 regional toxum sertifikatlaşdırma laboratoriyasının müasir avadanlıqlarla və mebellə tam təchiz edildiyini, Elmi Tədqiqat Əkinçilik İnstitutunun 6 regional təcrübə təsərrüfatına istehsal gücü saatda 2 ton olan müasir toxum-təmizləmə xətləri alınıb istifadəyə verildiyini bildirib.

 

Tədbir beynəlxalq təşkilatların nümayəndələrinin və özəl toxumçuların çıxışlarından sonra müzakirələr formasında davam edib.

Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə edilməsi üzrə Dövlət Xidmətinin təşkilatçılığı ilə fermer və kənd təsərrüfatı məhsulları istehsal edən sahibkarlara güzəştli kreditlərin verilməsi sahəsində şəffaflığı təmin etmək məqsədilə bir sıra bank və bank olmayan təşkilatlarla niyət protokollarının imzalanma mərasimi keçirilib.

Mərasimdə bank və kredit təşkilatlarının nümayəndələri ilə yanaşı, Azərbaycan Hökuməti ilə kənd təsərrüfatı layihələrini həyata keçirən bir sıra nüfuzlu beynəlxalq təşkilatların – Dünya Bankının, Beynəlxalq Maliyyə Korporasiyasının, BMT-nin Ərzaq və Kənd təsərrüfatı üzrə Təşkilatının (FAO-nun), Avropa Yenidənqurma və İnkişaf Bankının, eləcə də Maliyyə Bazarlarına Nəzarət Palatasının, Azərbaycan Sahibkarlar Təşkilatları Milli Konfederasiyasının, Azərbaycan Nar İstehsalçıları və İxracatçıları Assosiyasiyasının təmsilçiləri də iştirak ediblər.

Tədbiri giriş sözü ilə açan Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin müdiri Anar Hüseynov ölkə başçısının aqrar sahəyə göstərdiyi diqqət və qayğıdan söhbət açaraq kənd təsərrüfatının yeni inkişaf mərhələsinə qədəm qoyduğunu qonaqların diqqətinə çatdırıb.

Dövlət Xidmətinin rəisi Mirzə Əliyev çıxışında aqrar sahənin inkişafı üçün ölkədə fermer və kənd təsərrüfatı məhsullarının istehsalı ilə məşğul olan sahibkarların güzəştli kreditlərə çıxış imkanlarının artırılmasının vacibliyini bildirib. Onun sözlərinə görə, kreditlərin verilməsində şəffaflığı təmin etmək, aqrar sahə üçün kreditləri daha əlçatan etmək, eləcə də daha sağlam bank və kredit təşkilatlarını kənd təsərrüfatı kreditlərinin verilməsinə cəlb etmək üçün banklarla Dövlət Xidmətinin əməkdaşlığını yenidən nəzərdən keçirilib. İlin sonunadək Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti müvəkkil banklar vasitəsilə fermerlərə 10 milyon manatadək məbləğdə kredit verməyi planlaşdırır. “Kreditlər vətəndaşlara maksimum 7%-lə veriləcək. Bütün ölkəni əhatə edən iri bankların müvəkkil bank kimi seçilməsi fermerlərdən girov kimi paytaxtda daşınmaz əmlak tələb edilməsinə də son qoyacaq”, – deyə xidmət rəisi qeyd edib.  

FAO-nun Azərbaycandakı Tərəfdaşlıq və Əlaqələndirmə Ofisinin rəhbəri Mələk Çakmak Azərbaycanın kənd təsərrüfatı sektorunun son illərdə əldə etdiyi nailiyyətlər barədə məlumat verib. Bildirib ki, aqrar sahənin inkişafı ilə əlaqədar dövlət siyasətinin əsas istiqamətləri ərzaq məhsulları üzrə idxaldan asılılığı azaltmaq, ərzaq təhlükəsizliyini gücləndirmək və ixrac potensialını artırmaqla ölkəni əsas ixracatçı ölkələr sırasına gətirməkdir.

Dünya Bankının Azərbaycandakı ofisinin nümayəndəsi Rufiz Çıraqzadə bildirib ki, kənd təsərrüfatı sahəsi Dünya Bankı üçün həmişə prioritet sahələrdən biri olub. Bankın dəstəyi ilə Azərbaycanda keçirilən layihələr bu sektorun müxtəlif sahələrini əhatə edib.

Qeyd edək ki, niyət protokolları Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti tərəfindən “Azərbaycan Beynəlxalq Bankı” ASC, “Paşa Bank” ASC, “Kapital Bank” ASC, “Turanbank” ASC, “Rabitəbank” ASC, “Aqrarkredit” QSC BOKT, “Finoko” BOKT ASC, “Finans İnvest” BOKT ilə bağlanılıb.

 

Azərbaycan Dövlət Aqrar Universitetinin tələbələri İsmayıllı və Qəbələ rayonlarında fəaliyyət göstərən müxtəlif tipli heyvandarlıq təsərrüfatları ilə tanış olublar. Tanışlıq Kənd Təsərrüfatı Nazirliyinin Dünya Bankı ilə birgə həyata keçirdiyi “Kənd Təsərrüfatının Rəqabət Qabiliyyətinin Gücləndirilməsi Layihəsi” çərçivəsində baş tutub. Layihənin Heyvan Sağlamlığı və Baytarlıq Xidmətləri Subkomponentinin dəstəyi ilə universitet tələbələri Yeni Zelandiyadan dəvət edilmiş beynəlxalq təcrübəli mütəxəssisin iştirakı ilə İsmayıllı rayonunun  İvanovka kəndində yerləşən və postsovet dövründən başlayaraq həmin dövrə xas ənənəvi idarəçilik üsulu ilə  fəaliyyət göstərən Nikitin adına kolxozuna və müasir tələblərə cavab verən Keyvəndi kəndində qurulmaqda olan “AZZA Aqro” MMC şirkətinə, eyni zamanda Qəbələ rayonunda fəaliyyət göstərən “Gilan Holdinq Aqrokompleks Qəbələ” MMC şirkətinə səfər edib.

İsmayıllı rayonuna səfər zamanı tələbə və mütəxəssislər rayon İcra Hakimiyyətinin başçısı Mirdamət Sadıqov ilə görüşüblər. Görüşü zamanı rayonda heyvandarlığın gələcək inkişaf perspektivləri barədə müzakirələr aparılıb, başçı tələbələrə ixtisaslı kadrlara ehtiyac duyulduğunu bildirib və təhsillərində uğurlar arzulayıb.

Səfər zamanı tələbələr təsərrüfat rəhbərləri, baytarlıq mütəxəssisləri ilə məhsuldar görüşlər keçirib və onları maraqlandıran sullara ətraflı cavablar alıblar.

“Gilan Holdinq Aqrokompleks Qəbələ” MMC şirkətinə səfər zamanı şirkətin təcrübəli baytar həkimi Sübhan Dadaşov təsərrüfat haqqında tələbələrə praktiki cəhətdən xeyli maraqlı faktlar çatdırıb, görülən işlər barədə məlumatlandırıb. Tələbələr karusel tipli 24 başlıq sağım xətti ilə əyani şəkildə tanış olub, xəstə heyvanlar üzərində tətbiq edilən müalicə tədbirləri, heyvandarlıqda balanslaşdırılmış yemləmənin tətbiqinin əhəmiyyəti barədə məlumatlar alıblar.

Qeyd edək ki, indiyədək ADAU-nun Baytarlıq təbabəti və zoomühəndislik fakültəsinin 200 nəfərədək tələbəsi Kənd Təsərrüfatının Rəqabət Qabiliyyətinin Gücləndirilməsi Layihəsinin bütün tədbirlərində: brusellyoz xəstəliyinin müəyyənləşdirilməsi məqsədilə serosorğuların keçirilməsində, təlimlərdə, peyvəndləmə kampaniyasında, serosorğuların nəticələrinin epidemioloji təhlilində, Respublika Baytarlıq Laboratoriyasında müasir müayinə metodlarının tətbiq edilməsində yaxından iştirak ediblər.

Dünya Bankının Cənubi Qafqaz üzrə regional direktoru Mersi Tembon Gəncədə Azərbaycan Xalq Cumhuriyyətinin muzeyini ziyarət edib. Dünya Bankı rəsmisinə hazırda Azərbaycan Dövlət Aqrar Universitetinin yerləşdiyi bu binanın müstəqil Azərbaycan dövlətinin ilk hökumət binası olduğu bildirilib. Xanım Mersi Tembonun Gəncəyə səfəri Azərbaycan Dövlət Aqrar Universitetində keçirilən Azərbaycanın Dünya Bankında üzvlüyünün 25 illiyi və ölkənin kənd təsərrüfatının inkişafı sahəsində fəaliyyətinin 20 illiyinə həsr olunmuş tədbir çərçivəsində baş tutub. Azərbaycanın qürurverici tarixə malik olduğunu bildirən xanım Tembon qeyd edib ki, ölkəmizin müstəqilliyinin bərpasından sonra Dünya Bankı daim öz dəstəyi ilə Azərbaycanın yanında olub və hal-hazırda iqtisadiyyatın bütün sahələrində inkişafa dəstəklə bu yaxınlığı nümayiş etdirir.

“Bu gün Azərbaycanın qərb bölgəsinin mərkəzi, qədim Gəncə şəhərində olmaqdan məmnunluq duyuram. Şadam ki, 25 illik etimada əsaslanan əməkdaşlığımız müddətində Dünya Bankı Azərbaycanın inkişafına töhfə verib. Mən kənd təsərrüfatının  və kənd yerlərinin inkişafı sahəsində əməkdaşlığımızı xüsusilə qeyd etmək istərdim. Əminəm ki, birgə işimiz Azərbaycanın bütün bölgələrinin dayanıqlı və tarazlı tərəqqisinə gələcəkdə də kömək edəcək” – xanım Tembon deyib.

Kənd Təsərrüfatı nazirinin müavini Seyfəddin Talıbov qonaqları Azərbaycan tarixində belə dəyərli iz qoymuş məkanda salamlamaqdan qürur duyduğunu bildirib. Nazir müavini qeyd edib ki, Dünya Bankı Azərbaycan Hökumətinin ən etibarlı və mühüm tərəfdaşlarından biridir. Dünya Bankının dəstəyi ilə Kənd Təsərrüfatı Nazirliyi tərəfindən bir neçə layihənin həyata keçirildiyini diqqətə çatdıran Seyfəddin Talıbov hazırda davam edən Kənd Təsərrüfatının Rəqabət Qabiliyyətinin Gücləndirilməsi Layihəsi və  İkinci Kənd İnvestisiya Layihəsini xüsusilə vurğulayıb. Tədbirin ADAU-da keçirilməsinə diqqəti çəkən nazir müavini gələcəyin aqrar mütəxəssislərinin Azərbaycan hökumətinin və Dünya Bankının ölkədə həyata keçirdikləri layihələrdən xəbərdar olmalarının vacibliyini bildirib. Nazir müavini Dünya Bankının layihələrdə kadr hazırlığına xüsusi diqqət verdiyini əlavə edib. Xüsusilə, Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində keçirilən tədbirlərdə Azərbaycan Dövlət Aqrar Universitetinin tələbələrinin iştirakının, heyvan sağlamlığı və baytarlıq təbabəti ixtisası üzrə təcrübi fəaliyyətlərə cəlb edilmələrinin, bitki mühafizəsi ixtisası üzrə kurrikulum hazırlanmasının, elmi-tədqiqat işləri ilə məşğul olan gənc kadrların xaricdə və ölkəmizdə müxtəlif proqramlarda iştirakının gələcəyin aqrar mütəxəssis potensialının gücləndirilməsinə töhfə olduğunu vurğulayıb.

Tədbirdə Dünya Bankı ilə birgə həyata keçirilən Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində yerli şitil, yerli tərəvəz toxumu və yerli kişmiş istehsalı dəyər zənciri sub-layihələri qrantı almış Samux və Şəmkir fermer-sahibkarları ilk dəfə olaraq, öz layihələrini ictimaiyyətə təqdim ediblər.  

Tədbirdən sonra Dünya Bankı nümayəndələri ADAU yataqxanasındakı şəraitlə və universitetdə yeni tikilmiş müasir tipli tədris-təcrübə ferma kompleksi ilə tanış olublar.